查看單個文章
舊 2016-03-05, 12:05   #4
seemebreakthis
普通會員
 
註冊日期: 2008-12-27
文章: 31
seemebreakthis 是普普通通的會員
又係時候回饋本論壇啦! 去咗六日六夜, 其中五日滑雪.

首先對白馬最深刻嘅印象係,有架車真係方便好多!我哋跟咗 hakubapug 巴打嘅建議,租咗架車。不過就唔係喺東京租,是在長野租車然後駕駛大概一個鐘頭鬆啲入白馬。咁樣自己覺得揸得冇咁辛苦,而長野去白馬條路都幾好揸,好多時係一條線行車所以可以揸得好斯文,冇人會嘗試爬你頭,只要你唔好太慢。

架車係白馬真係好有用。可能因為唔係 peak season 關係,朝頭早就算晏小小去雪場都唔怕冇位泊車,包括 Happoone, Goryu, 47, Iwatake, Tsukaikekogan, 全部都可以泊在 chair lift 對面的停車場。好多時會有專人指你去泊位,一啲都唔混亂。至於夜晚,冇咗架車更加唔掂!可能係因為我哋book嗰間酒店距離市區比較遠少少,其實老實講都唔係好遠,不過在白馬所有嘢嘅分布實在係太散,例如你去完食飯想去 Lawson 買啲嘢,基本上唔揸車係冇可能做得到。又例如你今晚想去白馬市中心食,聽晚想去 echoland 試吓嗰度嗰啲餐廳,如果你冇車就真係 sorry 啦! 好彩租咗車,而架車在白馬亦十分好用。

酒店我哋搵咗一間叫做 Hakuba Yamano Hotel。好老實講啲設施就真係唔係好敢恭維啦!佢個早餐亦都係簡簡單單,不過冇得比較所以唔知道係唔係白馬所有酒店都係咁!不過勝在所有嘢都乾乾淨淨,所以整體來講都算係 OK 嘅!不過同我之前去過二世古啲酒店比較,就真係有少少差別啦。個感覺基本上就係簡單同埋舊,個性價比認真係麻麻哋。

但係滑雪果方面就真係值回票價啦!尤其係 Happoone 以及 Goryu / 47 嘅山頂部份,壯觀得嚟又有好多唔同雪道種類可供選擇,包括我一路想挑戰嘅 moguls,可能因為我去第一日落咗一次大雪嘅關係,第一日尤其好玩,山頂上面啲說鬆鬆軟軟又未畀 groom 過,真係一流嘅練習場地!基本上每一個雪場如果你滑得夠快嘅話一日內應該可以玩晒所有綠色,紅色,及 single black 嘅雪道(double black 我唔敢玩)。結果用左五日玩左五個大場,包括八方尾跟,五龍, 47 , 岩岳,及栂池高原。白馬最大嘅問題係每一個雪場基本上係唔連接嘅,如果去玩啲比較細嘅雪場,你有可能朝頭早玩完一個後跟住又要換鞋,再揸車去第二個雪場玩下晝。

我哋買咗個五日嘅 ski pass (¥24,500),不過強烈建議不要購買幾日票,其實你因應需要每一日同酒店買你果日想去個雪場嘅即日票應該會仲抵,而且反正就算你買左幾日票,你都要每次朝早去到個雪場用嗰張幾日票去換番嗰個雪場嘅即日票所以其實每日都仲係要排隊。基本上幾日票係無着數嘅。

至於夜晚食嘢個方面,有若干好受歡迎嘅餐廳真係要一去到白馬就要 book 定,因為佢可以要幾日後先至有位。亦因為咁樣有幾間餐廳我哋根本試唔到。包括深山燒肉,及喜八居酒屋。嗰兩間餐廳晚晚都爆滿,睇落啲嘢真係幾好食,不過無緣嘗試。

整體上對白馬嘅印象都係唔錯嘅!不過認真講句唔會特登再返去滑。

此篇文章於 2016-03-05 12:07 被 seemebreakthis 編輯。. 原因: 打錯字
seemebreakthis 目前離線   回覆時引用此篇文章